正喺馬來西亞集訓嘅巴西大軍，日前以設施唔妥善為理由再換訓練場──已經係幾日之內第三次。
據講巴西喺嗰邊對安排諸多不滿，但我求大俠覺得大馬並唔係咩體育強國，球場及體育設施當然係有限公司，呢樣嘢森巴軍去集訓之前應該預計到。如果此行達唔到練兵效果，只有怪自己「捉蟲」。
據有關方面講，巴西除咗彈大馬啲球場草地差之外，重要求人哋將一啲特別健身器材送到巴西隊酒店，認真巴閉。
難得大馬方面夠厚道，雖然被巴西挑剔，但話明仍會盡量滿足對方要求，重一早預咗幾個球場畀巴西再換，都算唔話得囉。
我求大俠咪話過英格蘭中場杜利華冼佳亞好慘嘅，做球隊第二十四人，得個等字，前日重孤零零咁由南韓返咗英格蘭。不過，入選咗二十三人大軍嘅英格蘭國腳都算有人情味，佢地投票決定，如果英格蘭捧走世界盃，杜利華冼佳亞都會有份獎金，重有二十萬鎊（約二百二十萬港元）咁多㖭！
法國前鋒亨利由於膝頭韌帶有傷，喺前日友賽浦和紅鑽冇踢到，話要喺星期日進一步檢查，咁啲傳媒就大做文章，話亨利可能要退隊，法國會補選安歷卡等。搞到法國教練拿美爾喺噚日立即改口風，話亨利冇事，連星期日對南韓嘅友賽都可能上陣。我求大俠就相信亨利應該唔會傷得太嚴重，況且佢對法國咁重要，球隊冇話唔等佢嘅！
前日立法會終於通過咗嗰條境外賭博條例草案，我求大俠對呢條例就不置可否，不過網上就好多唔同聲音，有啲重幾過癮。例如有網友問如果收受境外投注的莊家有罪的話，咁香港人託朋友在國內代買中國足球彩票，中央政府會有罪嗎？亦有球迷話下次投票選賢能，如果個候選人政綱入面有「爭取賭波合法化」的話，必定大力投佢一票，認真抵死！
聽日場中葡大戰，一直有話早已售罄嘅門票被炒高咗幾倍，不過香港就好似唔多見呢個情況，部份拍賣網站入面到𠵱家仍然見到有門票待價而沽；而過去幾個禮拜成交次數及「金額」都唔算太高，貴價飛放到四百蚊已算好價。家陣重久不久傳話費高唔落場、范大哥有傷避戰等消息，我求大俠真係戥嗰班到𠵱家重有飛放唔出嘅朋友擔心囉。
馬拉當拿又有新聞。話說佢九一年因藏毒有案底，日本話之你係上世紀球王，一於唔畀佢入境，點知佢嘅經理人哥普拉就懶醒話，日本仔可以放啲掟原子彈落佢國家嘅美國人入境，就係唔畀馬拉當拿。睇怕呢番挖人瘡疤嘅話，一定辣㷫到日本仔，哥普拉呢趟實行做定倒米壽星都得嘞。