話咁快重有一個禮拜世界盃就殺到埋身，相信各位球迷已經整裝待發去迎接呢個四年一度嘅盛事，不過大家有冇諗過帶埋你部Palm去迎接世界盃？皆因唔少精采Palm軟件係專為今屆世界盃而設計，等大家可以好好記低賽果之餘，重可以溫習定各隊球隊往績及球員過去表現，屆時睇波估賽果必定更加投入，各位球迷絕對唔好錯過今日嘅介紹喇！
記者：劉耀祥 攝影：伍慶 Model：Polly
由三大軟件公司合力編寫的WCup2002，絕對係各位球迷必備軟件之一，最大原因當然係費用全免。不過唔使錢就唔代表WCup求求其其，相反畫面靚仔醒神之餘，在資料搜集上亦交足功課，WCup集合今屆主辦國日本及韓國所有賽事球場資料，每個場地的賽事時間都詳細列明。而每隊參賽隊伍亦有比賽日期及往績等簡介，等大家可以準時坐定定為自己偶像打氣。
售價：免費
網址：
所有世界盃Palm軟件之中最漂亮，亦是最貴的PSCup2002，最強功能是在世盃舉行期間，每日都會有相關新聞直接傳送到你的Palm中，時刻都可知道賽事發展。而資料方面亦是眾多軟件中最豐富的，詳列過往11屆世界盃冠軍及所有參賽球隊的過往成績，以及排名都有顯示。而PSCup2002亦是唯一可顯示中文的世盃軟件，不過就只限於日期顯示，球隊及球員名單就暫時仍是英文。
售價：US$11.99(約HK$92.82)
網址：
若果大家每次都要為球賽分數「埋單」而頭痛，WorldCup2002就可以幫你手。只要每場賽事完結後輸入分數，佢就會自動幫你計晒數，所有排名晉級都一目了然，而且重Show埋大大支國旗，大家睇波嘅時候就可以順便認清楚人哋支國旗。WorldCup2002亦可以讓用家記低每場賽事由邊間電視台播放，不過只有BBC及1TV供用家選擇，未能自行變更就有點美中不足。
售價：US$3.00(約HK$23.4)
網址：
整個世界盃共有64場賽事，要逐一記低都真係幾頭痛，不過FIFAWORLDCUPFIXTURE2002可以將你喜愛嘅賽事直接複製往行事曆中，並可以設定響鬧，到時到候提醒你，咁就唔會錯失每場賽事。而FIXTURE2002內更設有六種語言介面，不過以歐洲語言為主，例如葡萄牙文或意大利文等，幸好都有英文供選擇，所以香港用家都可以用得着。
售價：US$4.99(約HK$38.9)
網址：