上兩個禮拜講起旺角玩具高買王「新奇士」，可能曝光率太高，好快已遠離兆萬範圍。江湖傳聞「新奇士」仍在旺角搵食，不過已轉去亞皆老街一帶，最容易碰上當然係皆旺商場喇，不過皆旺地庫班玩具店老闆並非善男信女，「新奇士」亦唔敢太猖狂，老闆們損失唔算慘重。
最慘係窩打老道間兩層高模型舖，嗰度班Sales可能年輕，喜歡偷食瞌眼瞓，店裏防盜設備又不足，「新奇士」每日就手持大膠袋去「掃貨」，每日偷三、四隻12吋軍事Figure去豉油街放，套現幾百就收工。偷足成個禮拜，班Sales都唔知懷疑邊個好。
「新奇士」近日出動重孭埋背囊，左手仍然手持啡或黑色大膠袋，落手完畢後會去第二度處理價錢牌等「事後」工作。有時重會換過第二件T恤避免人哋認得。外形蓄陸軍裝短髮、圓面、強壯身材、黑皮膚、五呎八吋高，鍾意着貼身短袖T恤。真係唔明警方搞火百合搞得咁成功，但區區一個小偷會捉唔到？竟被佢反轉旺角。
主持人：大食Jack
八卦熱報：