昨日講豪宅宣傳，並無不敬之意。左丁山冇資格買呢類豪宅，兼且住慣喺密度低，空氣清新嘅區域，亦都唔會適應天橋大馬路旁邊嘅「豪宅」，你估好鍾意聽車聲隆隆，廢氣滿天飛嘅環境咩。左丁山只係想指出，宣傳樓盤唔應該太過誇張，位於窩打老道而要與加多利山扯上關係，除非喺高層某樓起一條天橋搭過去加多利山啦。𠵱家新樓好賣得，市區「豪宅」冇乜跌價，推銷唔需要咁過火啫。
講起廣告，最近嘅市道好似有啲起色，生意好番咗，但初期迹象就顯示趨於個別發展，有啲傳媒好好，有啲仍然處於劣勢。在宴會上碰到玩具D，佢話𠵱家賣玩具好依賴電視卡通及電視推介，即係「無綫一台」獨佔風騷，仍然夠膽增加廣告價（ratecard浮價），皆因亞視積弱不振也。玩具D話目前推銷玩具，一要漫畫，二要卡通，三要電視節目，其他媒介似乎都係花巧功夫，全無實際促銷作用。正因如此，玩具D對有線兒童台寄予厚望，希望呢個台能日漸普及，多一個推銷媒介，唔使俾無綫翡翠台㩒住砌。
諗落又係，左丁山讀小學時，已經有「可口可樂」搖搖，估唔到現在啲細路又係玩搖搖。玩具D話每隔六七年就可以推動一次搖搖熱潮，約一年左右，細路就冇興趣，佢哋（玩具公司）要耐心等待下一次循環嘅來臨。睇落啲玩具商都幾有辦法，專門自家長口袋中挖錢，百挖百中㖭！