噚日比賽除咗雙方球員之外，另一個焦點就係來港探聽土耳其軍情的中國隊主教練米路天奴域，佢老人家頭場結束之後先出現，重坐喺貴賓位，記者當然一窩蜂影佢，佢重頻頻向觀眾揮手，夠晒親民。
前幾日重落住大雨，但噚晚球場反而極之悶熱，球場重出現咗好多飛蟻，喺草地同觀眾席飛來飛出，令本來已經熱到冇乜心機既球迷煩上加煩。
頭場就結束個陣，土耳其同南非一齊到場邊熱身，兩隊都集中喺北看台邊個草地熱身；而效力利華古遜既爾迪雷就最世界仔，不斷同南非球員打招呼，夠晒先禮後兵。
大球場設施本來一流，大電視又大又靚，但噚日個電視重播就非常差勁，好多入波重播鏡頭都欠奉，現場觀眾眨下眼都隨時錯失精采片段。