近排除咗受外資大行垂青嘅工業股勁升外，其他升到你唔信嘅股仔，多數係賣殼。小初噚日同經紀陳睇吓啲殼股邊隻有得諗。
經紀陳諗咗一輪，話華脈無線通信（499）同埋北海集團（701）可以諗。
佢話華脈除咗𠵱家做開地產嘅大股東外，以往亦有一班大陸炒家喺科網電訊股熱潮時揸咗一手貨，但據聞雙方好早以前已經唔多夾嘴形，所以大陸炒家已一早沽貨，就算沽唔晒，亦因為公司早前發新股進行收購而大幅攤薄。
華脈股價長期唔多郁，但一有買家想問價，股價就即刻郁動變成上菜咁款，所以稍後股價仍然會有波動，有留意價值。
華脈噚日高開低收，跌7.45％，收14.9仙，睇怕再散多一陣貨，幕後人會趁低收番，稍後再炒過都唔定。
北海聽聞傾緊藉注資發新股而轉埋大股東，但究竟件事有幾堅，就連經紀陳都唔肯定。
慕容小初