趙飛雲呢個禮拜做咗箭靶，前日啱啱講完中移動（941）有機會成為好友反攻主力，噚日隻股就俾淡友圍攻，大跌3%，收25.80元，連20日線（現處25.95元）亦稍為跌穿。中移動呢幾日須盡快抽回26元之上企穩，否則將下試50日線24.75元支持。
恒指噚日再跌170點，收11625。技術指標開始轉弱，10日線轉升為跌，9RSI明顯背馳，MACD線亦稍為跌穿訊號線，發出警號。
不過，恒指噚日跌近5月2日上升裂口11577有支持，而恒指第一次跌至20日線（現處11676）附近，通常會有反彈，再睇番恒指日線圖，由5月初至今，形成一個11600-12000嘅橫行區，後市如果繼續保持呢個橫行走勢，則11600會係底部，可以博反彈，因此趙飛雲尾市喺0.285元買咗20萬份恒指Call輪9045，博恒指就算唔係見底重展升浪，亦應有短線反彈。
策略上，恒指如果升至10日線（現處11759）受壓，恒指輪9045先沽出獲利，如升穿10日線則伺機加注，一旦升近萬二關受阻則沽出套利。另一方面，如先向下跌穿11497（即完全補回上升裂口），則止蝕離場。
趙飛雲