每年長和系嘅股東周年大會，都係小股民接觸超人李嘉誠嘅好機會，噚日就有位身穿紫色旗袍，頭戴兩隻紫蝴蝶頭飾嘅小股民，專誠到海逸酒店一睹偶像風采。小姐芳名羅潤儀，除咗悉心打扮，重買咗隻五千蚊嘅周大福白金鑲鑽戒到場，鑽戒內側重刻埋李嘉誠個名。周小姐今次遇到對手喇。
羅小組話自己今年四十四歲，舊年離婚但冇仔女。有日做家務時突然諗起李嘉誠，覺得佢形象正面，自此奉為偶像，去年十月更以每股六十六元購入二千股長實股票，又以六十三元購入一千股和黃。她又買咗三十七萬股電訊盈科股票，雖然噚日亦係電盈股東會，但佢只捧超人場。
超人對於有超級fans送贈鑽戒，佢笑話：「無功不受祿，不過都多謝佢好意。」見到超人拒人千里，在場有記者馬上話：「個股東好靚女噃！」誠哥佻皮地回應：「多謝你提醒我。」但最後都係由實Q招呼個女Fans。
心情靚極嘅誠哥又話自己做善事嘅時間多過做生意，咁點樣分配時間呢？超人話：「你上我寫字樓，我寫字枱後面一定有一大堆餅乾，肚餓就食餅乾。」嘩，超人搞到食餅乾唔食飯？有記者唔信，故意話：「我哋冇機會上去噃。」誠哥一派順得人，「你派代表就幾時都嚟得，不過𠵱家我點請得你哋咁多人嚟。」
小小超李澤楷嘅電盈亦喺噚日開股東大會，未知小股東是心如止水抑或覺得股價已經跌定，並無好似上次咁出現上海婆大吵大鬧嘅場面，只得兩個股東提出問題，分別係幾時有息派同埋公司前景如何？而小股東化悲憤為食量狂掃點心，八方都見慣不怪。
傳真︰2623-9278
電郵︰