陳松伶（松松）近日被不法之徒盜用其身份證號碼及住址等個人資料，將她手提電話號碼取消，與此同時，更有人訛稱記者，登門造訪她登記住址的親友家，令松松極度困擾，她於是在昨日到將軍澳警署報警求助。
早前楊婉儀因不停被電話騷擾而報警，想不到陳松伶（松松）的情況更無助。
剛自新加坡工作返港的松松，昨日在電話中說：「我喺新加坡嗰陣，發覺手提電話用唔到，所以我噚晚一返到香港，即刻打電話去『數碼通』check吓發生乜事。點知發覺原來有一個姓陳嘅男人，攞晒我啲個人資料，好似身份證號碼同埋登記地址，話係我授權畀佢，叫佢幫我取消個電話。」
松松被取消手提電話翌日，竟有一男一女自稱記者，登門造訪她親戚家，亦即是她申請電話號碼和信用卡的登記地址，問他們是否松松的養父母。雖然其親友表示甚麼也不知道，但二人離開十數分鐘後折返，令其親戚不勝其煩。
松松說：「我親戚好驚，即刻打電話畀我契家姐，不過，當時自稱記者嗰對男女，由頭到尾冇出示過記者證，所以我好懷疑佢哋嘅身份。我覺得我好似俾人鎖定目標，所有個人資料都喺人哋掌握之中，我擔心連信用卡、以及車同樓都會出事。
「所以我今朝一早，將所有信用卡cut晒，同埋去律師樓將名下所有車同樓都轉晒名，包括之前喺《智在必得》贏咗嗰層內地樓同一部車。而且，就連我所有嘢嘅登記地址都改埋，唔再用親戚個地址。」
松松表示，現時她名下沒樓沒車，名副其實的零資產，不用擔心人家再打她主意。松松除了「斬腳趾避沙蟲」外，更為安全計，在昨日前往將軍澳警署報案，松松說：「我打去『數碼通』度，想話睇吓邊個人盜用我嘅個人資料，點知數碼通嗰邊話呢啲係個人私隱，唔方便透露，我覺得好好笑，𠵱家係我個人資料俾人盜用喎，點會係保障番嗰個盜用我資料嘅人㗎？」
採訪：戴彩煥