著名經濟學家凱恩斯（J.M.Keynes）說過：「從長遠來看，我們都是死人。」（Inthelongrun,wearealldead.）我們注定逃不過死門關，一切只是時間問題而已。所以照料「死人」應是一門好生意。
金融風暴以來，本港自殺人數大增，殯儀業應該一枝獨秀。身為資深死人化妝師兼世界殯儀館董事陳美齡（Mayme）卻說，死得人多並不好賺。「以前多數人係老病而死，子孫會畀錢辦後事。但自殺死者通常都好後生，大多數有經濟困難，甚至欠落周身債，連幾千蚊一個套餐（葬禮）都買唔起，有時見到啲可憐嘅，私人貼錢幫佢搞掂！」
Mayme姐是死人化妝界名人，近年不斷有人寄信或上門自薦學藝，但一一被拒：「呢行得幾間殯儀館，學識未必有工開！」她三十七年前，跟首位華人死人化妝師兼契媽鄺金枝學藝，一九七五年與丈夫及友人合辦世界殯儀館，多年來處理過逾二十五萬具遺體。而處理過的知名人士，包括影星傅聲、歌星鍾保羅、老牌影星黃曼梨、遭槍殺警員梁成恩、被縱火燒死的高級入境事務主任梁錦光等。
死人化妝屬冷門行業，一般不會公開招聘，Mayme姐自稱在麻雀枱上被「氹」入行：「以前陪契媽(鄺金枝)打麻雀，佢成日氹我去做死人化妝，結果大半世人都喺殯儀館過。」鄺金枝曾在上海開設殯儀館，一九五八年來港後，成為首位華人死人化妝師。
Mayme姐曾於養和醫院當護士，常看到奄奄一息的垂死病人，轉行後第一次與屍體長時間相對，她坦言害怕：「後來發現服侍死人重輕鬆，因為佢哋唔會投訴，唔會出聲。其實人都死咗，留低喺度啲親人先最重要，親友見到死者面容安詳，就會好過啲，有啲嘢係做畀生人睇，緊要過為死人而做。」
死人不會對儀容作出評價，但一些出席喪禮長者竟主動向她交代後事：「啲老人家都唔怕『棹忌』，指定要我幫佢哋化妝。粵語片明星黃曼梨生前話明要我幫佢化妝，最後都了咗心願，佢去時個樣好似瞓覺咁。」
八歲開始信奉天主教的Mayme姐，亦想過自己後事：「我選擇天主教葬禮，一切簡單就得，早幾年已經交代徒弟要同我化個靚妝，等我乾乾淨淨離開。」她叫徒弟為自己化妝之餘，亦曾為師傅鄺金枝化妝：「契媽喺八八年腦充血死咗，我想同佢化妝，點知睇住佢個樣，就不斷諗番起契媽以前點錫我、點教我，眼淚不斷咁流，最後喊到收唔到聲，要徒弟幫手埋尾。」
陳姑娘目前有一男一女徒弟，男徒弟陳忠成拜師逾二十年，是行內唯一男性死人化妝師，早前陳再收了徒弟，陳姑娘總算有了徒孫。
記者：吳淑義
（周一至周五刊出）