正當人人研究朗拿度對NIKE新波BOOT有幾舒服、碧咸對ADIDAS全新PREDATOR點樣好着之際，香港波鞋界突然有對全城最貴嘅白色戰靴喺市面售賣。冇錯，呢對價值二千港元嘅波鞋，李華度將會着住喺世界盃亮相，加上全球限量發售2002對，難怪香港水貨店引入20對，迅即賣淨兩對。
今次以水貨形式引入全新MIZUNO李華度戰靴嘅K&B，負責人KENNY對日本出產嘅草地波鞋情有獨鍾。「李華度呢對波鞋重量只有二百二十克，雖然唔算全球最輕，但若以全袋鼠皮製造計算，今次MIZUNO嘅設計已經算一項大突破。」有十年售賣日本版波鞋嘅KENNY表示。
除李華度波BOOT外，K&B亦有幾位日本國家隊球星別注版波鞋出售，包括為人熟識嘅中村俊輔和名波浩，以及較為冷門嘅森岡隆三和中澤佑二。KENNY話：「呢幾位日本球星嘅波鞋雖然罕有，每對價錢大約一千五百港元，但都唔及李華度呢對咁矜貴。由於李華度波BOOT屬限量生產，每對會有獨立編號，加上禮合包裝，呢對可以話喺我十幾年見過草地足球鞋中，最貴嘅一對。」
圖/文：李勇明