大市急跌一日，好彩可以喘定，噚日恒指就在100點的窄幅內上落，以接近全日高位11795收市，升41點，成交77億元，沽盤已有收斂之勢，期指尾市掃上11830收，轉為高水35點。期指下禮拜結算，係好友贏，抑或淡友勝，再過幾日就揭曉。
大藍籌回穩，長實（001）和黃（013）都反彈。市場有消息，話中港聯盟嘅華資大軍再作部署後，將會捲土重來。噚日佢哋小試牛刀，再買住和記港陸（715）同深圳國際（152）呢兩隻焦點股，營造番啲氣氛。
港陸噚日收1.12元，升5仙；深國高收0.415元，升3仙，升幅7.8%，兩股走勢都再現突破，以量度升幅計，港陸可見1.5元，深國0.48元。同屬長和系陣營的辰達永安（1189），由於有大盤洗倉，呢兩日嘅表現明顯跟唔上。不過，睇噚日個勢，大沽盤已冇再主動質貨，洗倉行動應已接近尾聲。港陸近日已升逾1成，辰達安永𠵱家落後一大段路，隨時會急起直追。
佑威國際（627）有大行掃貨，由0.82元掃到上0.87元，收0.86元，升6仙，成交大增到1.43億股，相信半數俾大行「食咗」，呢個位上車，睇5成利潤，股價已可見1.2元。
另外，早輪推介嘅林麥集團（915）急升到2.875元高收，進帳12.7%，仍可持有，以突破三角形的量度升幅計，短線上升目標為3.5元。
新股如林麥、德發集團（928）同崇高國際（209）等係咁升，市場又開始尋寶，天鷹電腦（1129）收0.67元，升2仙，升火待發，暫時0.7元有阻力，但一破位，升勢轉急，最少可見0.9元。
天鷹01年度（12月結）業績理想，獲利3170萬元，升45%，每股盈利10.6仙，02年度料升至12仙，PE8倍，股價已可見0.96元。重有就係天鷹1月中上市，半年時間快到，隨時會有大動作。
郭兆誠