財政司梁錦松將紅酒稅由六成加到八成，香港酒店協會、蘇豪協會同蘭桂坊商會等團體上星期大力反對。點知政府靜雞雞做咗個調查，大爆酒店、蘇豪同蘭桂坊食肆賣嘅酒比出廠價貴十幾倍，而紅酒稅只係按出廠價收取，對零售價只有1.34%至6.75%影響。言下之意，即係市民飲貴酒係因為業界食水深，唔關政府事！
「蘭桂坊之父」盛智文噚日同八方呼冤，話政府調查誤導，皆因食肆並非直接由外國酒廠買酒，而係透過中介進口商入貨。進口商毛利同餐廳嘅運輸、員工成本、燈油火蠟加加埋埋，賣紅酒絕對冇十幾倍暴利。但佢都承認紅酒毛利有七、八成，不過要補貼其他利錢低嘅食物，否則多數餐廳都要執笠。盛智文重大想頭，話希望政府掉轉減兩成稅，否則外國遊客會覺得香港消費貴咁話。
傳真︰2623-9278
電郵︰