意大利前鋒恩沙基日前高呼自己將會係今屆決賽周嘅巨星。點解呢位帥哥突然咁招積？無他嘅，據聞意大利正選爭位形勢出現咗變化，恩沙基極可能響決賽周首戰對厄瓜多爾踢正選，搶走同自己唔啱嘅迪比亞路個正選位置。唔止咁，恩沙基重可以同自己傳過搞基嘅「老死」（死黨）韋利夥拍雙箭頭，唔開心就有鬼嘞。
據小道消息講，雖然迪比亞路聲稱話唔介意件十號波衫畀托迪着咗，其實唔開心就梗有啲；喺上個禮拜意大利對捷克時，查柏東尼本來想搵迪比亞路踢進攻中場，殊不知金童唔肯就範，最後被飛起無得踢正選。據講呢次事件後，兩個人關係麻麻，間接益咗恩沙基。
英格蘭喺禮拜二公布咗世界盃大軍名單，戴亞雖有傷在身，但係仍然入選，而咁即係話後補嘅杜利華冼佳亞要返歸。其實杜利華冼佳亞佢喺禮拜二對南韓場波，着住件「24」號波衫出場，都應該心照自己冇行，唔怪得有人報料話見到佢坐喺後備席嗰陣，猛咁睥住坐喺佢側邊嘅戴亞啦！
愛爾蘭有一家七口為咗籌二萬鎊（約二十二萬港元）旅費去日、韓幫愛爾蘭打氣，竟然將間屋按畀銀行。或者有人覺得佢哋咁做好戇居，但有時價值觀嘅嘢，真係唔可以用錢嚟衡量。況且自己國家隊打入世界盃，當然要瞓身支持啦！之但係，如果愛爾蘭唔止打三場分組賽，真係擔心佢哋到時搵乜嚟做抵押。
冇份幫英格蘭打世盃嘅列納，走去拍咗個電訊廣告，輕輕鬆鬆就袋咗二十五萬鎊（約二百七十五萬港元）落袋；唔學似班英國腳咁辛苦，就算攞到個世界盃返嚟，都係得嗰二十萬鎊多啲。之不過，𠵱家啲球員踢世界盃已唔係為錢，係為名，事關打得好，俾啲大球會睇中，淨係份合約都幾百粒，到時乜都抵返晒嚟啦。
英國啲傳媒前晚報道巴里斯經已加盟咗富咸做足球總監，但巴里斯喺禮拜三就否認有咁嘅事，話佢只係喺考慮階段，重話啲英國傳媒無中生有。查實巴里斯都唔使咁㷫，係人都知英國傳媒最鍾意小題大做，如果佢連咁都頂唔住，我求大俠就勸佢無謂過英國搵食嘞！
E-mail:
求驗客手記逢星期一至五刊出