蔡少芬（Ada）同吳啟華前晚喺李鄭屋邨，拍攝無綫新劇《黑夜彩虹》。前晚劇情講戴住眼鏡、紮孖辮嘅Ada，唔小心整傷個BB姪女，佢冒雨送BB入醫院，其間遇到好耐冇見嘅舊同學吳啟華，啟華就用貨車送佢一程。
但因為前晚冇落雨，惟有用兩條消防喉做雨景，現場吸引咗近五十個街坊圍觀。Ada好似落湯雞咁全身濕晒，佢話：「冇所謂，唔辛苦點得世間財？我嚟緊有場跳水戲㖭，但我最怕都係吊威吔。」Ada等埋位嗰陣，同啟華打嚟打去開玩笑，啟華笑住話：「佢喺套劇入面好似《我的野蠻女友》咁，好鍾意打人。」
Ada話：「佢開工第一日就打咗我一巴，無論女人有幾野蠻，男人都唔可以打番女人。」佢兩個打完交又鬥嘴，好似打情罵俏咁，問啟華怕唔怕女友嬲，Ada即刻話：「怕乜，打之嘛，又唔係咀。」
陳文媛（BoBo）早前同一班義務醫生去咗湖南，佢今次主要係探訪一啲骨折同埋燒傷嘅病人。BoBo喺醫院重睇咗一個駁骨手術，佢話呢次嘅探訪簡直令佢畢生難忘。由於湖南最出名係食辣嘢，但係BoBo就一啲辣都唔食得。好彩當地人特登包餃子畀佢食，但係BoBo食咗成個星期之後，佢話呢半年內都唔會再食餃子。
人氣組合F4成員吳建豪日前偕同其他成員，為佢媽咪開嘅健身中心剪綵。原來佢哋啱啱去完美國洛杉磯同迪士尼簽約，佢哋話心情就好似放假咁，所以佢哋做完迪士尼安排嘅工作後，夜晚就由吳建豪帶隊去食好嘢同行街街，又去迪士尼樂園，玩得好開心喎。
王家衛執導、梁朝偉及木村拓哉主演嘅《2046》，今年喺康城影展中賣片，好多片商依然對王家衛作品深感興趣，重預計佢呢套戲會成為出年康城影展嘅焦點電影之一。《2046》喺康城賣片，重白紙黑字寫明出年五月交片，所以王家衛一定要喺出年五月前搞掂套戲畀片商。
周星馳（星爺）噚日下晝四點幾出現赤鱲角機場，佢由助手陪同下喺內地返香港。對於噚日有報道指日本發行商將會喺日本國家足球隊參加世界盃賽前，播映電影《少林足球》特別場幫球員減壓。星爺話：「我唔知喎，咁佢哋對少林隊有乜嘢睇法呢？唔知佢哋覺得套戲點呢？」
張瑛個仔張煒被控喺上年七月九號，喺青山公路附近不小心駕駛。案件噚日上庭，法官最後判佢罪名不成立。張煒話當日佢揸車返亞視拍《非常好警》，王薇都坐喺車入面。張煒話收到告票已經係幾個月後嘅事，自己都毫無頭緒。噚日王薇都去咗法庭做證人，而張煒女友江美儀都有去旁聽。