八方前晚打電話搵大榮華老闆韜哥，諗住訂間房下個禮拜食冰肉燒鳳肝，呢間元朗名店一共得五間房，手慢啲都冇位。點知韜哥都話唔好意思，原來間舖要大裝修，一眾食客睇怕要忍耐一陣口水。
韜哥話，唔想好似傳統中式食肆咁，只顧煮餸唔理環境，佢希望啲客入到嚟見地方企企理理，食得更開心。呢個新廚神，真係有諗頭，唔怪得大榮華晚晚高朋滿座，連特首都要專程去試試佢嗰味「元朗烏頭」同「豬油撈飯」。
韜哥話近日非常唔得閒，除咗忙裝修，重要同女廚神拍檔上電視。原來無綫好有諗頭，見飲食節目收得，繼《名人飯局》之後，再斬十二輯，請咗韜哥同黃又又如合作，到各地搵靚料靚餸返嚟喺電視機前開飯，整番幾味撚手菜，八方聽到都流口水。
講開女廚神黃又又如，佢本為金融界中人，後來在中環開名貴雜貨店，被《壹週刊》捧紅。佢係鄧鏡波外孫女，得到鄧家為食真傳，追求美食奄尖刁鑽，連白粥、蒸水蛋都一絲不苟，搞到肥佬黎都要做佢客仔。無綫今次斟得男女廚神聯手出擊，收視肯定爆燈。
傳真︰2623-9278
電郵︰