左丁山自幼在油旺何文田區行走，每行到亞皆老街過咗大同中學、神召堂，或者喺太子道行到新法書院，就唔敢轉上條嘉道理道，皆因老竇教落：「嘉道理道上去加多利山，上面好多大屋，全部都係嘉道理爵士家族嘅物業，租畀啲有錢佬，你唔好同班同學走上去嘈生晒呀，警察會拉晒你哋。」
於是要到大個仔之後，入社會做事好多年，一位舊同事發咗達，搬上加多利山之後，先有機會上山入嗰啲大宅。原來嘉道理家族收租一啲都唔算貴，十零萬租間咁大嘅靚屋，負擔得起嘅話，直情抵到爛，老友記個廳大過阿叔間屋，一家五口，都唔知點用好。後來肥佬黎搬上加多利山，請食飯，左丁山叨陪末席，又見識多一次香港真正豪宅之巨型；城大校長張信剛住響加多利山，在家中辦過三四十次「文化沙龍」，左丁山掹衫尾，去過一次，見到個客廳可以做小講室，坐四五十人，仍然綽綽有餘。
呢日睇樓盤廣告，位於窩打老道、中華電力總部隔籬嘅高層大廈，以加多利山為號召，內容猛咁講加多利山點樣「出塵脫俗，高不可攀，傳奇背景。」再講山上住戶如鄭翼之家族、雷覺坤等等。咦，人哋係加多利山，你係窩打老道，扯上乜嘢關係呀？再睇吓啲單位面積，標準單位至係928至1323平方呎，又學乜嘢呢，實用面積重細過肥佬黎個客廳！大家若有資格買呢個樓盤恭喜晒，不過千祈唔好以為自己與加多利山住戶同級！