美股周二晚繼續跌，杜指跌1.2%，納指更大跌2.2%。淡友噚日早段有過零星攻勢，但好友11700防線未受太大考驗，其後好淡喺11750附近窄幅爭持，港股跌唔落，尾市有部份淡友計數離場，帶動恒指升41點，收11795。加時階段有淡友平倉，期指轉炒高水35點，但參考作用未必太大。
噚日形勢對淡友有利，但未見淡友乘勢追擊，如因此而認為淡友冇料到，則未免過份輕敵。雙方對戰完第一個回合後，似在重新部署，等待消息出擊。
趙飛雲檢閱好友陣容，長實（001）及和黃（013）「中鏢養傷」，滙豐（005）近排升得多要唞氣，目前最有潛力掛帥打衝鋒，似乎非中移動（941）莫屬，睇埋近排華資行亦出報告推介中移動，好友以中移動掛帥攻打萬二關機會唔細。
睇圖中移動唔算好靚，噚日跌近20日線（約26.90元）反彈，倒升0.15元，收26.60元。向好方面諗，短期守穩26元，會喺26至29元範圍上落。趙飛雲一向怕玩中移動，因為隻股變數多，多藉口炒上炒落，唔容易把握，而窩輪就更加難玩，因此左計右計，睇好後市都係主力買恒指Call輪9045，中移動輪只會買些少。
趙飛雲