長實尖沙嘴港景峯響復活節假期搞skyparty，向買家送贈直升機暢遊優惠，今個禮拜六就安排首批客坐直升機。
美聯物業精英會今日舉行「智在碌齡」傳媒同樂日，邀請傳媒參加保齡球比賽，贏咗重有獎品㖭，地點在將軍澳維景灣畔會所。另外，中原精英會一行幾十人，最近獲公司資助，到台灣觀摩後，覺得香港樓市都唔係咁差。
將軍澳維景三期同元朗蝶翠峰二期公布開售詳情，市場睇實由3大發展商合作嘅土瓜灣傲雲峰幾時賣，今日公布詳情，市傳今個禮拜六內購，若果屬實就精采，因一日有4個新盤開賣同內購。
蘭西最近收到置地嘅刊物《Uptown》，內容有介紹旗下物業同業務發展，亦有講飲講食。置地之前都出過兩份刊物，一份主力介紹公司同商廈物業，另一份就講有關商場動向，後來了解到外界希望有更廣泛資訊，所以將兩本刊物合併成𠵱家嘅新版本。
港姐鄭文雅繼日前租出東半山蔚豪苑單位後，另一收租物業跑馬地帝華閣昨日亦以1.6萬元租出，為1樓B室，722方呎，連約1100方呎平台花園，呎租22.2元。
蘭西