呢排外資行認真厲害，好多推介嘅細價股都有如坐火箭急升。
小初於是急call喺外資大行做分析員嘅細姪女Amy，問吓佢呢排有咩心水推介。
Amy年初推介小初買入作長線投資嘅維他奶（345），股價由推介時1.20元，升到𠵱家1.51元，計落都賺咗超過廿個巴仙。
Amy今次話，近排外資大行嘅金手指，非歐資行瑞記莫屬，尤其係噚日佢哋再次品題嘅自然美（157），可以望多幾眼。
今次瑞記將自然美同另一隻美容股奧思（1161）做比較，佢話前者係綜合美容股，而後者則淨係賣一隻牌子嘅產品，點計都係自然美前景好啲，所以繼續推介買入自然美。
本來小初以為自然美經過上次升浪，大戶已經散晒貨，但睇番噚日成交急增，大升6.1％，收1.04元，Amy似乎冇講錯，小初真係有啲心動。
慕容小初