備受車迷注目嘅新版紳寶9-3，最近廠方正式公布關於此車嘅詳細資料，新車不但擁有極富吸引力嘅造型，設備及安全設施齊備嘅車廂之餘，一台2.0公升Turbo引擎，所迸發出嘅210匹馬力，更係新車賣點所在。
從相片中可以睇到，新版紳寶9-3嘅造型，明顯較原有車款來得更突出；除一組炯炯有神嘅頭燈襯以闊大鬼面罩，令車首造型更富魅力之餘，流線型嘅車體設計，重令人覺得有Coupe跑車嘅影子㖭。至於車廂布局方面，新版9-3不但空間來得更寬敞，從而令乘坐舒適性倍增之外，各項設備又見齊全，使用時十分方便；經過強化嘅車身結構，配合車內多個安全氣袋配搭，亦能為車上每位乘客，帶來最佳嘅保障。
然而，廠方亦為選擇新版9-3嘅用家，提供有多台引擎選擇，當中頂級版所配用嘅一台2.0公升Turbo引擎，馬力輸出高達210匹，從而令新車可有更出色嘅性能表現。有興趣嘅車迷，就要留意一下新車嘅推出日期喇。