標普一句睇淡樓市，將地產股展望評級調低，就將港股拖低221點，恒指收報11753，即月期指更大挫360點。
不過，同時有資金流入，港股似乎又未到絕境。其實投資者早就睇淡樓市，對和黃（013）3G亦相當審慎，因此證券界在估計和黃投資價值時，通常都將3G價值當為零，所以標普實際殺傷力有幾大，大家都心知肚明，不過淡友當然唔會放過呢個機會反攻。大家對後市仍要小心，因為美元弱勢有可能加快美國通脹來臨，加快美國加息步伐。
宏昌科技（061）噚日停牌，話要配股集資。市場傳出，將以先舊後新方式，發行4000萬股新股，配售價每股0.53元，集資2120萬元，配股價較停牌前折讓17.2%。據聞批貨配畀友好人士，所以即使配售價折讓幅度較大，復牌後股價應不會大跌，甚至會炒上。ｉ師傅話，此股動作多多，現正積極考慮分拆旗下DMXTechnologies上市，若計劃落實，到時現有股東可能會獲得分派。
大市噚日大幅下滑，但二三線股仍各自各精采，其中日東科技（365）勁升24.4％，成交金額達2409萬元。黑客話，炒家將股價挾高，再谷大成交，企圖吸引散戶跟進。公司日內可能會公布好消息，或同賣殼有關。今年初公司正副主席曾經大手減持套現，唔通大股東真係無心戀戰？
鈞濠（115）曾傳出復牌大炒，但噚日股價卻下挫4.2％。Cookie話，主要係因為大戶壓價收集，若大戶出貨，成交又點止830萬元咁少呢？ 阿虎