前日贏港聯二比○嘅土耳其，噚日喺小西灣運動場復操，正當個個球員輕鬆操練之際，前鋒奧簡同蘇古加操狂練射門，奧簡重練到腳腳七注咁厲害。奧簡咁認真，唔知同佢對港聯時冇「士哥」有冇關係呢？
港聯隊長丘建威經過對土耳其一役後，開始感受到呢支南歐球隊嘅真正實力。阿丘話前日比賽期間，土軍二十一號仔安利成日向佢投訴香港天氣悶熱影響發揮，但事實上呢位矮仔重可以喺中場滿場飛。阿丘諗，如果安利真係冇講大話，土耳其實力一定唔只咁簡單。
福士帶領嘅蘇格蘭隊已經四戰四敗，正當回歸盃其他三支球隊噚日都有操練時，福士竟然畀班球員輕鬆一日。雖然土耳其操練完後都喺維港遊船河，但蘇格蘭大軍噚日拉隊去屯門黃金海岸一間會員俱樂部打網球，又游水享受日光浴，唔使打世界盃原來可以咁梳乎。
最近幾日香港都有傾盆大雨，南非噚日喺旺角場操練時就遇正場地積水，佢哋喺「大爛地」練波，最後個個變晒泥鴨，要用水沖身先可以上旅遊巴士。