中國隊近年成績唔錯，可惜在香港受歡迎程度比唔上日本，Vincent認為致命傷係國足欠缺星味，佢話日本球員個個打扮得靚靚仔仔，相反國足就冇形象可言，特別係李鐵把長髮，好似六、七十年代人物咁老套，一定要搵張叔平（金像獎美指）執一執。
初為人父嘅達明，波癮一樣咁大，好多大場波如歐冠盃決賽都會捱眼瞓睇直播，但睇波習慣就要改一改，起碼唔可以大嗌同爆粗，好彩老婆大人都好識做，BB餐夜奶就由老婆代勞，唔使打擾達明嘅睇波興致。
拍攝期間少不免要佢哋踢番兩腳，球技方面達明就好啲，後腳一挑回身一射，動作有板有眼，相反Vincent就比較粗枝大葉，最叻就係擲界外球夠大力，好彩Vincent有幾個小朋友索取簽名同合照，觀眾緣搭夠。