南豐發展荃灣嘅南豐紗廠重建項目，雖然重未賣得，但已經改名叫翠豐臺（TheSummit），不過，已入咗申請預售書嘅將軍澳住宅項目，就好似到𠵱家都未見有名。
由太平協和同新世界中國合作發展嘅廣州天河《協和‧新世界》，委任置業國際做獨家策劃同代理，今日兩家發展商都會出席記者會，推介一番。
紅磡廣場日前有一個149方呎舖位，以3萬元賣咗，呎價201元，成交價咁低，對同區舖位買賣有冇影響呢？蘭西見到報紙廣告，紅磡區有個150方呎商場舖位，叫價8萬元放售，睇怕暫時到唔係咁易有承接。
新鴻基地產屬下啟勝物業管理公司嘅高級花王鄺貴榮，響2002年度香港花卉比賽攞咗6個獎；鄺生最近重成功培植全港獨有的「中國龍」百合花，遲吓新地旗下樓盤住客有機會欣賞到呢種百合花都唔定。
長實荔枝角盈暉臺已經賣得七七八八，另約10萬方呎的商場，從招租嘅資料睇，除有「百佳超級廣場」外，重有室內冷氣街市、食肆、幼稚園、家品、美容同便利店等。
怡高嘅地產代理業務改名高力國際之後，物業同設施管理業務，噚日就正式用置邦物業服務有限公司呢個新名經營。置邦現時係怡和全資附屬公司。
東半山蔚豪苑B座高層1號室，啱啱以月租5.2萬元全包租出，據屋之島東半山分行經理歐志康形容，單位裝修甚有品味，面積1993方呎，呎租僅約26元，業主係虞哲輝，即港姐鄭文雅個老公。
蘭西