「有人話我黐線，又有人話我唔係人，做埋啲咁嘅嘢，畢業點解唔係即刻搵嘢做。其實我哋都不過係鍾意去旅行，順便做埋善事啫。」被人話黐線的主角名叫阿Ben，是香港大學電機及電子工程系三年級的學生，他將會和拍檔於六月中為無國界醫生進行踩單車籌款，由青海出發到西藏，在尼泊爾補給後再前往新疆，善款全作改善中國落後地區的醫療設施。雖然這次義舉不是太多人認同，但他們依然相信，明白他支持他的大有人在……
記者：曾順珍 攝影：周旭文
第一段路程：青海格爾木市→西藏拉薩
第二段路程：拉薩→尼泊爾加德滿都
第三段路程：加德滿都→阿里地區獅泉河
第四段路程：獅泉河→新疆葉城
全程：共約5,000公里
出發日期：6月中
到達目的地日期：約10月中
經費贊助及籌款活動查詢：
網址：
精心部署半年
阿Ben好緊張整個訪問為他所拍攝的照片，不停向記者詢問會否損害他的形象，擔心會令人覺得他們鬧着玩，對今次的籌款不認真。這也難怪，因為怎麼說都是第一次作公開籌款，而且又是跟無國界醫生合作，所以他不喜歡別人說他們心口得個勇字，還強調這次跟拍檔阿Jack是經過半年來的精心策劃，並不是一時興起的念頭。
「為咗今次籌款，我哋成立咗一個名叫『香港自助旅行者協會』，連名字都註冊埋。直至𠵱家，我哋個會一共有十幾個會員，佢哋全部都係大專生，有來自港大、中大同理大，喺今次嘅籌款活動中，他們主要負責搵贊助商同跟傳媒聯絡。」
最怕高山症
阿Ben說這次所選的路線都算艱巨，預算六月中在青海的格爾木市出發，進入西藏首府拉薩，繼而到尼泊爾的加德滿都，再到阿里地區的獅泉河，最後來到新疆的葉城，全程共5,000公里，約在十月中踩畢全程。
由於整段路程多屬高原地帶，途經幾十個大大小小的山口和不少著名地區，如唐古拉山口、喜馬拉雅山、界山大坂等，所以很容易會有高原反應，即高山症，在高原空氣含氧量低的情況下，出現頭暈、疼痛、全身無力及呼吸困難等。
「講真句，踩單車上山唔難，只要意志力強就得，最驚就係有高原反應，因為我都唔想死㗎嘛，所以我哋會慢慢踩上山，令身體作出適應。重有嗰度嘅日溫差幾大，一日之內可以由攝氏零下十多度到二、三十度都得，所以我哋都要帶備雪褸保暖。
喝湖水小心變啞
「沿路嘅補給亦係一個問題，因旅館唔多，而且我哋每人身上只會帶備約三日嘅食水作後備。高原上雖然有好多湖，但聽喇嘛講，有啲湖水含太多礦物質，飲咗會令人變啞，唔可以亂飲。」
因為路途偏遠而且還在人煙稀少的地方裏，所以阿Ben會召集多三名隊友一起出發，以便在路上互相照應。而且基於安全理由，阿Ben還準備向電訊公司租一部衞星電話，以防有事故發生時，都可以跟外界聯絡。還打算通過香港的中聯辦，聯絡當地政府機構，好作照應。
內蒙幾條村一個醫生
阿Ben的廣東話不太純正，例如會把「西藏」說成「屎撞」，他的名字「許彬」會說成「海濱」，他說因為思考快過說話，所以很多時表達上會出現問題。所以在整個訪問裏，拍檔阿Jack便要間中擔任「繙譯」的工作。
「我本身喺大陸出世，大約十三歲就移民嚟香港，我淨係記得鄉下潮州嘅醫療設備好落後，例如無心電圖咁。當我去內蒙旅行時，聽到當地人講話成幾條村合共只得一間診所、一個醫生，有啲診所甚至要行四、五十公里，六、七小時至到達，啲工具又舊又殘，所以我成日都想幫佢哋改善吓，而今次嘅籌款我第一個就諗到要捐畀內地改善吓啲醫療設施。」
鍛煉意志應付逆境
阿Ben話空閒時最愛看科幻、武俠小說，行山或踢足球等運動，至於踩單車則並非他的至愛。
「我知道西藏人因宗教理由會一面朝拜一面上山或落山，非常辛苦。而單車係嗰度嘅主要交通工具，踩單車上山比行路更辛苦，為咗鍛煉自己嘅意志，我決定以踩單車嘅形式去籌款，希望他日遇到不如意嘅事，我都唔會好似𠵱家啲人咁，無晒鬥志要尋死。我聽行過呢段路嘅人講，去完返嚟成個人會脫胎換骨，以後發生乜事都能夠應付，我都希望可以好似佢哋咁。」
畢業唔係即搵工？
對兩個二十出頭的學生哥來說，要進行這次單車旅程，可說是個艱辛的計劃，所以身邊的友人聽後都無不感到驚訝。
「佢哋有啲話阿Jack係鐵人，話我唔係人，因為佢哋覺得無可能會完成到。有啲就話喺呢個時勢，畢業後第一件事梗係搵工啦，重搞咁多嘢！不過都有同學知道後覺得踩單車籌款好有意義，於是立即捐咗兩百蚊畀我。至於屋企人呢，可能因為已經習慣咗我成日去旅行，所以只係規定我最少要有兩個人先可以去。
「驚唔驚？唔驚，反而好興奮㖭，最擔心都只係高原反應同迷路，不過帶備指南針就應該無問題。打劫？我諗唔會啩，我哋分分鐘成個月都無涼沖，到時個樣重污糟過當地人，應該唔會打劫我哋嘅。」
出書分享經驗
阿Ben希望今次旅程可以籌得20萬元，透過無國界醫生，捐助給大陸作改善落後地方的醫療設備。
「我哋𠵱家已經周圍搵緊贊助商贊助旅行用品，暫時就只有一間戶外旅行用品公司做贊助，如果搵唔到單車贊助商，我哋先至考慮買單車，預計連日常開支每人要三至四萬蚊左右。
「完成今次旅程後，我打算會出一本書，將呢個旅程嘅每一日都記錄落嚟，跟其他人分享我哋嘅經驗同好靚嘅風景。」
訪問結束時，他依然要問：「啲相影出嚟唔會令我嘅形象好差啩？真係唔會令人覺得我哋玩玩吓至好喎……」
姓名：李嘉俊（Jack）
年齡：22歲
學歷：香港大學電機及電子工程系三年級
旅行年資：1年多
曾旅行地方：
內蒙、吉林、遼寧、河南、河北、湖南、湖北、江西、四川、陜西、山東、山西
姓名：許彬（Ben）
年齡：22歲
學歷：香港大學電機及電子工程系三年級
旅行年資：3年
曾旅行地方：
新疆、甘肅、內蒙、陝西、湖南、湖北、浙江、江蘇、安徽、山東、山西、河南、河北