話咁快5月31日世界盃就正式開鑼，氣氛緊張到令人透不過氣。除咗各隊球員加緊練習，務求令自己處於巔峯狀態外，世界盃精品亦不斷推出新貨，希望令球迷留個美好回憶。繼之前港版精品後，韓國、日本亦各自生產壓軸精品，本來只會喺本土出售，𠵱家香港亦有幸返到貨。其中遲遲未出現嘅足球機終於由日抵港，另外韓國都有3D球員模型，件件咁精采。
記者：張穎倫 攝影：周旭文、陳穎
唔少球迷都會覺得足球LEGO、《WinningEleven》係好玩，但講到原汁原味，始終都係傳統嘅足球機（俗稱燒豬扒）最過癮，所以等今屆呢套足球機的確等到頸都長。不過今次呢部足球機加入嘅好玩新元素又確係抵讚，除咗球場有70cm夠大外，更加入射12碼、開界外球、角球、計時器等多種玩法，大人細路都啱玩。
繼LEGO加入射12碼後，連足球機都加入呢種新玩法，唔使好似以前要加時再加時，沒完沒了，而且射球方向更易調校，速度更快，守門員救波認真唔易。
以前玩足球機，球員只可以喺固定軌道上活動，每當碰上界外球，都只能在場內開波，有欠公平。所以今次就加入咗界外球發射，方便喺場外任何一處開界外球，夠晒有心思。
如果覺得70cm長嘅足球機太巨型的話，呢套只得20cm長嘅小型足球機就一定啱你。除咗細細部方便攜帶外，佢只用每邊角球位嘅氣泵吹郁足球，控制更加容易，而且唔使將球員逐個擺上更省時間。再加上球場以阿托、尼茲呢批大紅吉祥物做圖案，小朋友一定鍾意。
單睇肥嘟嘟嘅外形已經可愛到暈，所以無論喺日本，定剛剛到港都俾球迷狂掃，英格蘭、日本等隊伍已經俾人掃清。無獨有偶，只係得番法國、巴西呢對上屆決賽死敵重有得賣。樽套適合存放500ml水樽，最啱球迷睇波時解解渴。
表面上佢只係波衫一件，頂多只係印上世界盃Logo，衫長更只得28cm左右，小童尺寸冇乜特別。但望真啲你就會發現佢其實係一個小背囊，有齊可調校孭帶，兩個儲物格。除咗紅色同黃色外，更有藍色同黑色選擇，夠晒盞鬼，孭出街一定威盡。
上幾屆世界盃都以雷米金盃嘅精品最多人捧場，所以今屆頭幾批精品都以雷米金盃主打，但由於款式太多，開始令球迷有啲膩。到咗呢期以波衫精品最多人捧場，好似呢批球衣電話繩，細細個夠晒可愛，再加多個小足球，比日本出嘅電話繩更可愛，所以喺韓國非常好賣。
唔單止日本興紙版模型，原來韓國一樣流行，而且今次更化身為20cm嘅3D紙版模型。特別之處在於唔少紙版模型，都唔容易改變姿勢，但呢批球員嘅關節位可以隨意接駁。頂波、射門各種動作點擺都得，最正係兩個球員走埋一齊嘅時候，更可以做出搶波、攔截嘅場面，更有中國、巴西、韓國等多個球隊選擇，做擺設一流。
之前推出嘅唔少世界盃打火機都係塑膠製，好多時更印上阿托嘅公仔，睇落真係Young得滯。話晒吸煙都要年滿18歲先得，所以金屬製嘅打火機，先夠穩重台型。好似呢兩款打火機採用古銅色設計，而且圖案刻得極深，最啱成熟穩重嘅球迷。
日本出嘅世界盃精品，大部份都大大件，但韓國精品就剛剛相反。好似呢批哨子電話繩，只得4cm長，比一般哨子細一截，但都吹得響。再加上顏色夠Sharp，亦印上國際足協字樣，絕對有紀念價值。
LOFT（29713831）
金鐘太古廣場西武百貨LOFT
WorldCupExpress（91234621）
旺角先達廣場二樓S15號舖