帝王班球員同擁躉用盡所有方法都阻擋唔到湖人嘅拜恩，勢估唔到一個芝士漢堡包竟然可令高比仔苦不堪言。
原來高比仔前晚喺酒店叫房間服務時，食咗一個芝士漢堡包同一個芝士蛋糕；點知到半夜一點左右，突然覺得好唔舒服，成晚頭暈屙嘔，連第二朝嘅晨操都去唔到。積遜教練已作好高比仔缺陣第二仗嘅最壞打算，雖然喺臨開波前兩個鐘，高比仔病情好轉，最後頂硬上出場；但係同佢喺第一場威風八面嘅表現就相差好遠，搞到湖人最終輸波收場。
查實高比仔呢次突然食物中毒真係好耐人尋味，令人百思不得其解。因為當晚唔少湖人球員都係食咗同高比仔一款嘅芝士漢堡包，而且嗰晚成間酒店幾千個住客冇一個食物中毒，為何偏偏係高比仔中招？雖然我求大俠唔敢話高比仔嗰個「帝王芝士漢堡包」俾人專登加料炮製，但係如果話呢件事純屬巧合嘅話，真係好難令人信服。
簡尼沙利斯雖然因傷而打唔到今屆世界盃，但因為佢個人魅力不凡兼且大賽經驗豐富，所以重有份跟住西班牙去日、韓，順便幫手指導吓隊中三位龍門。之但係，我求大俠就好質疑佢究竟係咪真係幫到手，事關佢家陣連行路都要靠枴杖，淨係靠把口講，試問又點樣指導隊友呀？
盛傳曼聯想斟介利物浦嘅法國前鋒安歷卡，但我求大俠就覺得係流料居多。係人都知曼聯領隊費格遜份人心高氣傲，就連碧咸都忌佢三分，唔敢違抗佢命令；最慘就係安歷卡份人又鬼死咁麻煩，郁吓就玩嘢。老費會唔會啱心水呀！
意大利啲國會議員向意大利國家隊施壓，要求班國腳喺世界盃一定要唱國歌，但係國家隊教練查柏東尼就唔擔保佢哋一定唱，淨係話班球員都受過教育，應該識做嘅。其實計我求大俠話，每個人嘅表達方式都唔同，只要班球員喺個心度唱，都代表咗愛國，又何必苦苦相迫呢？
最近睇啲外電相，成日見到卡卡企喺朗拿度同李華度隔離，但千祈咪唔會佢係攝石人，查實佢因為太過靚仔，先至吸引到班攝記嘅注意。但我求大俠可以話畀大家知，卡卡佢唔只得個樣，其實幾好波，更有「新鄧加」之稱。各位球迷喺今屆世界盃，不妨留意一吓呢位新星啦。