素來畀人印象「敢言」嘅立法會議員余若薇，噚日喺浸會大學同一班學生仔講嘢，提到要做一個出色嘅領袖，秘訣原來係要靠發夢。佢講嘢當然唔係八方好想做嘅瞓覺發夢，而係要夠膽諗，咁先至會有遠見，但係一開始嘅時候可以唔好將目標定得咁遠，只要喺一、兩個人面前做好榜樣，畀佢哋學習咁就夠嘞，唔使好多人跟從，已經可以叫做一個偉大嘅領袖。聽落好似幾易噃！
余若薇又講到自己對於𠵱家學生參與政府活動嘅睇法，佢提醒學生，搞公民抗命嘅時候，要先清楚理解事情嘅後果，因為分分鐘有可能要坐監。佢又話，有啲事要大部份社會人士都支持，先值得去做。
佢重話，用敢言嚟形容佢唔係咁適當，因為佢話佢自己只係講真話，而講真話係唔需要勇氣嘅，反而用理性、坦白嚟形容貼切啲。
傳真︰2623-9278
電郵︰