我Apple姐幾時都話做靚女都要醒目，好似林建岳嘅下屬、靚女公關鄺心怡（Selina）咁，自從成為岳少新緋聞女友，即時身價百倍。聽講佢一味低調唔搶鏡嘅作風，最得岳少歡心。
Selina有份搞任賢齊演唱會，但就完全冇亮過相，𠵱家重連中環呢啲旺區都絕迹㖭！我Apple姐上禮拜行過時代廣場，重發現咗另一樣嘢！嗰日落緊雨，成村人企喺連卡佛門口避雨，着住套裝裙嘅Selina亦攞住個City'super膠袋一齊避雨，忽然見佢瞪大對眼，冒雨衝咗出去！原來附近咁啱有兩個揸住相機、好似記者嘅後生仔喺度等人，佢嘅警戒心真係好強噃。