耗資千萬　四姨太贊助
Kelly演唱會搵馬戲團表演

陳慧琳（Kelly）將於七月十二日至十七日假紅館舉行一連六場演唱會，今次演唱會以飛天舞會為主題。除了Kelly會在演唱會中飛起，還有一班俄羅斯馬戲團雜技員表演，製作費更達千萬元之多。

陳慧琳（Kelly）將於七月十二日至七月十七日假紅館舉行一連六場演唱會，昨日在黃埔海逸酒店舉行記者會，今次Kelly的演唱會名為「陳慧琳飛天舞會演唱會」，除了Kelly出席記者會外，多個贊助商亦有代表出席，當中包括代表澳門賽馬會的四姨太梁安琪。

「跳到飛起」
Kelly今次的演唱會以飛天舞會作主題，Kelly笑言：「咁話明飛天，我梗係會飛天啦，可能係吊威吔，咁梗係以優美為主，唔會好誇張，我重會跳到飛起㖭，因為我有好多快歌嘛。」今次演唱會更特別請來了一班俄羅斯馬戲團的雜技員為演唱會助興，Kelly表示：「因為我哋今次係四面台，咁我哋希望可以顧及晒四面同山頂嘅觀眾，所以喺空中都想畀啲嘢人睇。」

法國揀衫
問到製作費豈不是很大？Kelly謂：「我諗都好大㗎，我啲服裝費都唔少啦！重要我自己嘔住先，我都好肉痛呀！」
Kelly透露服裝已經準備得七七八八，大部份都是在法國親自挑選，但亦有訂做，Kelly說：「其中有一條褲要成八萬蚊，不過真係好靚，𠵱家大概一場有十幾套衫。」而Kelly經理人鍾珍透露製作費預計要用上千萬元。
此外，黃栢高昨日表示暫不會離開正東，現亦與Kelly傾談續約問題，希望可盡快傾妥。
採訪：胡比
攝影：陳炯威