金管局昨日舉行第五屆傑出人士講座午餐會，請來費沙爾（Dr.StanleyFischer）講亞洲金融風暴之教訓；費老係花旗銀行（前稱萬國寶通）第二把手，未入花旗之前，佢係麻省理工教授，主管經濟學系。
費老後來去幫國際基金會（IMF）手，一做七年，官拜第一副總裁。咁猛料，難怪港麗BallRoom座無虛設，全中環有頭有面嘅銀行家，幾乎可以見齊。
費老學而優則商，但佢之講稿仍不脫學者本色，相當艱深，聽到八方要問人；不過，任志剛總裁之開場白就聽落有味。
任總幫金管局用四十億買總部，惹來一場風波，昨日任總終於出番啖氣。話說佢介紹費老出場時，竟然公開話唔講得個貴賓係邊間銀行高層，點解？因為金管局係呢間銀行大廈嘅租客，為免人家誤會香港之央行係嗰間銀行嘅附屬機構，所以金管局盡量唔提人家個名，連信封信紙卡片嘅地址都避開唔印嗰幾個字；任總重話，佢搭的士都唔好意思同個司機講話去「萬國寶通」中心喎!
有冇咁誇張八方唔知，翻查該局人員卡片，真係只有「花園道3號30樓」，並無大廈名；而任總搵到個咁好機會去說服大家贊同佢買樓搬寫字樓，請晒人食晏又點話。
傳真︰2623-9278
電郵︰