上周六講完「破萬二勢在必行」之後，趙飛雲都有少少覺得說話係咪講得太盡，心諗會唔會周二復市變咗箭靶？有時啲嘢真係好嘅唔靈醜嘅靈，不過噚日趙飛雲唔係中箭，而係「中鏢」。
噚日早段和黃（013）及長實（001）逆市上升，倉內嘅和黃Call輪9050及長實輪9043都威過一陣，點知11點過後，期指突然急跌，趙飛雲當時雖然唔知發生乜事，但期指突然急跌肯定唔係好事，所以急忙沽貨，和黃輪9050尚有微利，但長實輪9043就要損手，只歎一句唔夠運。
好淡展開決戰之際，噚日標普突然調低香港地產股評級，殺好友一個措手不及，好友雖然中伏，但午市仍力守11700關，雖然尾市有部份計數盤令期指大幅低水83點，但期指未平倉合約大增至56565張，誰勝誰負似乎言之過早。
雖然恒指噚日急跌逾200點，期指重大幅低水83點，但淡友王牌已使出，稍後可能輪到好友反攻，因此趙飛雲部署喺20日線（現處11650附近）博反彈，伺機吸納恒指Call輪9045。 趙飛雲