大編輯相約在九龍茶餐廳，苦口苦面大吐工作苦水，以前做傳媒每年例加人工十巴仙，今時今日減人工都冇所謂，最怕公司執笠再搵工就好難。計仔多多嘅老細下令大編輯要多做有關拍賣網題目，佢立即惡補咩叫拍賣網。
係人都知拍賣網最出名係美國eBay，可能由於英文為主嘅關係，香港重未全面流行。不過新一代嘅細路實識，班細路碰口碰面就講自己對波鞋或玩具在網上炒到幾錢，指標大多來自eBay。連出名唔愛用電腦嘅Marc哥MarcJacobs，最近喺訪問度都話有上eBay睇吓咩料，佢話聽人講佢幫LV設計啲嘢在eBay有價，可見eBay影響力如何。
聽財經友講，eBay喺美國巿值已大過Yahoo，因為有穩定拍賣佣金收入。大食Jack唔識嘢，如果噏錯唔好見怪。其實大編輯個老細都好醒，鹿已捉到，𠵱家睇佢點脫角？不妨睇吓恭夫輝本eBay指南，深入淺出適合拍賣網初學人士。
主持人：大食Jack
八卦熱報：