下月初火辣登場
全新球員印名號碼Tee

雖然今屆世界盃嘅國家隊戰衣，大部份都加強透氣功能，但大熱天時要着住件尼龍質地嘅波衫，舒適程度始終唔及棉質Tee。想舒舒服服追貼世盃潮流，全新球員印名連號碼Tee，絕對值得推介。圖?文：李勇明

繼四月中發售一系列國家隊棉質Tee後，NIKE喺今屆世界盃揭幕戰後開始，將會推出最新系列世界盃印名連號碼Tee，公價每件售$169，球迷有買趁手。
有巴西朗拿度及卡洛斯、葡萄牙費高、法國亨利、意大利托迪、日本中田英壽和西班牙文迪達共七位世界級球星嘅連號碼Tee。

中田7號Tee印「HIDE」
最特別相信係亞洲代表中田英壽呢件，點解？係人都知中田英壽嘅英文名簡稱「NAKATA」，但呢件日本七號Tee嘅名卻印上「HIDE」……乜水嚟㗎！
「HIDE」其實都係中田英壽咁解，只不過NIKE今次用嘅係「HIDETOSHI」（英壽）頭四個英文字母，而唔係慣常用開嘅「NAKATA」（中田）。
事實上，日本足總即將公布嘅國家隊印名戰衣，中田英壽件衫後面，極可能都係印上「HIDE」，而唔係「NAKATA」。無他嘅，因日本隊另一位隊員中田浩二又叫「NAKATA」，一向要標奇立異嘅「壽哥」，又點會同人「撞衫」?