在石硤尾開業的大牌檔，十幾年來深得各新舊街坊及學生哥的支持，好些搬到老遠的舊街坊也愛回巢聚餐，全因食物水準穩定，加上超值晚飯$98套餐：三款自選餸菜、一碟油菜及例湯，全部加埋四餸一湯，老火湯足料，小菜選擇多。現在先看看至受街坊歡迎的小菜，睇啱今晚埋位試。
記者：楊一凡
攝影：陳智良
貌似馬英九的客家籍大廚華哥，一講起家鄉名菜特別醒神，他說：「粵式腩肉煮法，只是把所有材料撈埋煮，但客家扣肉細心好多，先把梅菜和腩肉炒香，然後鋪在一起，隔水蒸兩個鐘頭，由頭至尾不用加芡汁。扣足兩小時的腩肉，索盡梅菜精華，很入味而且入口即化，送飯最正。」
舊街坊Sally試味：客家扣肉，能煮出清淡清香的腩肉，而且不是油光滿面，梅菜令腩肉不會太滯肚。
$98三餸一菜一湯的組合，包括各式夏日新菜，而拍攝當日的老火湯是紅蘿蔔排骨湯。切件豬腳並沒有煮至甩皮甩骨，隨手夾起一件，都能感到其爽滑。豬腳在泡油後，才跟胡椒、薑、炸蒜子加清水，同燜個半鐘，燜好後記緊要跟大頭菜、薑和紅椒，落鑊兜一兜，臨尾加粉絲，焗一焗便可上碟。
試味報告：皮爽肉滑的豬腳配大頭菜同煮，味道甘甜，用油鹽水煮，感覺很清新，不肥膩，讓各位豬手Fans在炎夏照吃可也。
薑葱和魚雲，長年共對，唔悶就奇，有見及此，大廚把肥美的蠔仔許配給薑葱，做法跟一般煲仔菜差不多，把材料灼一灼，拉油搶皮，以便去除腥味，然後跟爆香的薑葱拋兩拋，就可落煲，冚蓋焗一焗，到你打開蓋時，葱香迸發。
舊街坊Jimmy試味：啲蠔仔幾鮮甜，大大粒幾好肉，用薑葱煮，簡單滋味，唔使話吓吓酥炸咁熱氣。
醬爆即是用豆瓣醬炒，豬頸肉沒腩肉的肥油，而肉質亦勝瘦肉，爽口的豬頸肉最適合跟西芹、雜菜及菇類同炒，材料味道清淡，正好讓豆瓣醬發揮味力，把各款材料的鮮甜誘發出來。
試味報告：這菜式實在好夠鑊氣，豬頸肉瘦中帶些少肥，但口感好爽，送啤酒好正㗎。
又係外表扁平的蘿蔔沙葛餡腐皮卷？錯嘞，大廚給它加料，塞滿肉碎和冬菇的腐皮卷，脹卜卜，有料到，把原條腐皮卷切粒，伴當時得令的勝瓜、草菇及紅蘿蔔同燜片刻，惹味得很。
郭先生試味：腐皮卷好香口，勝瓜好爽甜，它的甜滲入腐皮卷裏，有肉有菜，幾夠營養。
要是你嫌西檸雞的肉味太淡，就不妨試試西檸牛這道夏日新菜，先醃好牛仔骨，半粒鐘後炸至香口，再跟西檸汁同炒，最後伴鮮檸檬片出場，視覺和味覺都令人感到很開胃。
試味報告：牛仔骨煮得幾軟熟，用西檸汁煮跟黑椒汁好唔同，天口熱再吃辣感覺好𤷪𤺧，但佢改用檸檬汁煮就醒胃好多。
店名：樹記海鮮火鍋飯店
電話：27773684
地址：石硤尾南山邨二樓平台商場C4熟食檔
座位：約144個
營業時間：星期一至六上午11時至晚上11時半；星期日下午5時至晚上11時半。
付款方法：只收現金
備註：自選小菜套餐一款$38、兩款$68、三款$98，均送時菜一碟及例湯任飲。