上星期小初講過，東南亞木業（1205）股價急跌，係因為傳聞同北京中信合作收購新西蘭森林項目唔成事，點知噚日傳出又話得，令股價一度抽上1.19元，收1.14元，升11.8％。
不過，經紀陳話東木股價急升，似係虛火居多，尤其係成交細，只得465萬元，點睇都唔似有料到，況且收購森林項目都傾咗接近一年，中間又牽涉唔少人同事，東木要成為中信喺香港嘅林木資源旗艦，真係一啲唔容易。
經紀陳又話，東木有一班本地炒家睇住，但一直以來佢哋都頗為孤寒，除非係有大陸炒家落搭則另作別論。噚日睇咗全日，都唔多覺有大陸炒家嘅蹤迹，所以最終經紀陳同小初都冇上車。
另外，鈞濠（115）噚日公布投資一間治癌藥品分銷商，股價先升後跌。經紀陳話，隻股早幾個月曾遇重創，股份貨源分散咗，要重拾升軌唔容易，等佢完成單收購先諗。 慕容小初