上禮拜五，電盈（008）成交由0.24億股大增至1.06億股，股價升1格。拋空盤0.19億股，佔成交18%。
電盈拋空多，喺市況向上時，係好嘢而唔係衰嘢，因為落後，好易挾空倉。期指已越萬二，有溢價，大戶月底埋單，挾上多過挾落，𠵱家形勢，係炒上賺錢易過炒落賺錢，大戶冇理由唔明呢個道理。睇住嚟，電盈好快有挾空倉情況。
電盈Call輪9111，上禮拜五成交有啟示，共有1.06億份易手，大增3倍，又佔發行量高達42%，輪價變化跟足正股。正股明日有乜依郁，窩輪今日先有動靜。9111個勢咁樣，代表正股就嚟有嘢睇。正股有嘢睇之時，掉轉頭又再帶動Call輪向上。9111溢價低，9132壽命長，兩件都要買買買。
上實（363）近期喺高位反覆，呢隻老牌大紅籌，喺基金力捧之下，有機會由現價16.60元彈上19元。
上實Call輪9092，係冷品，現價29仙，8月到期，溢價負0.9%，槓桿率5.7倍，就算扣除正股34仙股息，隻輪都係吼得過。到期之前，正股見19元，9092就值55仙，幾乎有升1倍潛力。
章 盛