前一排左丁山講過藍田有人在快餐店執「餸尾」之事，令人鼻酸。讀者陳×強寫咗一封好長嘅電郵嚟，講述佢及朋友親眼在藍田、紅磡快餐店，睇到差不多同樣嘅事件：年約四十男士，行動正常，專吼別人食完早餐離開之後，就埋位食碟上嘅剩餘物。讀者陳睇到好難過，想買一份早餐畀呢位男士，但又驚佢難堪，想保留佢嘅自尊，所以冇做到。讀者陳話左丁山轉述惡佬明嘅故事，並非偶然單一事件，而係環境逼人，失業人士已經冇彎轉。
讀者陳自己其實亦已經失業四年兼因壓力關係，搞到心律不正常，好彩太太有工做，自住樓已經供滿，有少量積蓄，所以暫時生活冇問題，但又開始關心到兒女未來嘅教育費同老年退休費。
讀者陳所述嘅平民生活，與左丁山在中環所見，簡直係兩個世界，唔怪得有人反對政府總部搬去添馬艦，認為政府應搬去啟德機場。舊機場鄰近基層市民住宅，啲高官出入，會多啲機會體驗民間疾苦，覺得世界唔係真係咁美麗；否則嘅話，日日喺中環食一份三十六蚊嘅三文治，飲十七蚊一支嘅甘筍汁，以為就係等於「平民午餐」，就差之毫釐，謬之千里。常處中環，即使日日做足七十一，都唔會了解社會實況。