港隊成員睇波一向都可以免費入場，前港腳「細鬼」張志德噚日諗住捧場，但就俾驗票嘅職員留難，最後要勞煩港聯領隊之一周文亮畀張飛佢至可以入場，細鬼表示多年來為香港隊付出不少，今次事件令佢十分無癮。
前東方同快譯通名將奧沙，崔護重來香港，當然唔係代表港聯，而係幫主辦單位做公關工作。𠵱家佢喺英國踢緊半職業地區聯賽，得閒教吓波同做足球公關，生活都幾愜意。
賽前盛傳會來香港刺探土耳其嘅中國主教練米路天奴域，噚日就冇現身，只係派咗兩個技術訓練員入場睇波；據聞米路覺得港聯對土耳其壓迫性不足，睇唔到土耳其真功夫，反而留番星期四土耳其對南非時，先至會親臨現場睇波。
因為天雨影響，噚日回歸盃入場人數只得七千幾，比賀歲波差好遠，但三支外隊反而有唔少球迷入場支持，搖旗吶喊之餘重載歌載舞，難怪冇乜球迷打氣嘅港聯首場比賽就輸波啦。