5月去日本北海道，冇得去網走坐破冰船，札幌雪祭過咗，就連最啱搞個異地情嘅浪漫勝地──白雪小樽都無埋，除咗換上春裝嘅東瀛少女，相信都好難搵個原因去北海道玩。但未雨綢繆嘅你同我又點會咁諗吖！因為到咗下個月開始，位處富良野嘅一片吉田，就會開始以2002年全新春裝示人，而且月月轉款，重點當然離唔開代表高貴又大方嘅紫色薰衣草，各位觀眾，準備丟低老細，執拾行裝，出發！
記者：朱維達 攝影：陳盛臣
鳴謝：東瀛遊、國泰航空公司、Gore-Tex&Aigle、Bibi（Starzpeople）
FlowerLand可以話係北海道最有規模、最多「花」款嘅超級花田，向日葵、菊花、玫瑰都會於不同月份示人，但講到最「宏偉」嘅相信莫過於7月上旬至8月上旬釋放嘅薰衣草，劃一嘅紫色，密麻麻嘅草莖造就咗呢個璀璨卻短暫嘅美景。
由於時間嘅關係，FlowerLand嘅主人已經特備咗一個溫室，擺放咗3,000盆薰衣草畀大家頂癮，到咗6月，園內兩架觀光巴士會帶你遊園，車程約12分鐘，你鍾意親身體驗亦可以徒步遊園，路程約須30分鐘，再想親密啲，職員會派發一個介乎手指大小闊度嘅花環，你只須400円（約25港元）就可以跑到田間，摘一束自己最愛嘅薰衣草，你攞住束薰衣草返香港之後或者已經只係剩番一束草，但亦不失為一個體驗大自然嘅機會。
唔好睇完春田花花就急急腳走，FlowerLand其他配套設施亦好完善，上星期去到富良野，雖然行程緊密，但我都花上3至4個鐘先至離開，原因就係為咗整一個枕頭。
原來除咗正門內可以買到有關薰衣草紀念品、溫室內花上1,000円（約61港元）就可裝上3樽各類乾花種子做裝飾、又或是走上2樓歎番個1,300円（約80港元）嘅海鮮定食，FlowerLand左邊重有個手工藝場，你可以試試親手做一個薰衣草木牌裝飾（800円，約49港元），就算一個遊客入嚟，價錢都會包埋材料連導師教路，但我就鍾意親手做個薰衣草枕頭（600円，約37港元），做完之後密封返香港先拆開膠袋，你就可以帶埋富良野嘅薰衣草香味返屋企張床，同愛人共枕分享！
FlowerLand
地址：北海道空知郡上富良野町西5線北27號
電話：（81）167-459480
傳真：（81）167-456053
溫室入場費：500円（約31港元）
網址：
交通：由札幌市搭JR到上富良野站（約2小時30分鐘），再乘10分鐘的士可至。
無論你下次計劃嘅北海道之旅行程如何安排，似乎都離唔開從札幌市出發，但有幾個地方，呢兩個月錯過咗，可能就要等多四年，講緊嘅當然係最近食飯行街落K如廁時都有人講嘅世界盃！
貫穿札幌市、名聞全國嘅大型雪祭展覽場地嘅大通公園，𠵱家已經變得綠草如茵，除了一群白鴿慣常嚟公園食個早餐外，園內嘅鬱金香亦已綻放，而世界盃倒數牌亦已進入最後階段，雖然世界盃專門店、Loft嘅B2樓內有售賣北海道限定產品，亦曾經介紹過無數次，不過諗唔到就連出晒名生產白
IshiyaChocolateFactory
地址：063-0052札幌市西區宮 查詢：（81）11-6661483
網址：
交通：沿東西線宮
眼見就算係當地日本人，亦喜歡租用觀光的士遊札幌市。一般的士可分為兩種，自僱及租用，起表價為580-630円（視乎豪華與否），每次跳表90円。有租車公司可替你包車，一個價錢包司機同導遊（其實係同一個人），但費用一般不會包括道路過路費等。
札幌市內遊費用：13,500円（約830港元）
行程：大通公園、時計台、北海道廳舊本廳舍、北海道神宮等
時間：約2小時30分鐘
電話：（81）11-8310799
出門提一提
簽證：持BNO、特區護照或CI者遊日本均須簽證。查詢：25221184（日本領事館）
旅行團：北海道、函館夜景、露天溫泉、登別時代村五天團團費$6,099（6月2、9、16、23日出發），6月30日出發$6,199。查詢：23681277（東瀛遊）