上周五美股反覆回升，杜指升63點，收10353，納指升10點，收1741。可惜噚日係佛誕假期，港股休市，恒指未能乘勢食住上，香港假期太多，對短線炒家有一定不便。
噚日外圍股市並無太大啟示，美股期指略為偏軟。港股上周橫行4日後，上周五終現突破之勢，如果美股噚晚能夠配合，恒指今日再破萬二關嘅機會甚大。
即月期指未平倉合約仍高逾53000張，本周好淡開始決戰，一旦分出勝負，將出現單邊市，目前好友佔優。
趙飛雲近排講嘅都係認股證，冇照顧到唔鍾意玩輪嘅讀者，認真「鎖你」，今日一於提供隻股仔，畀大家參考。成衣股近日當炒，喺中港台都有服裝零售業務嘅慕詩（130），有短炒價值。
慕詩基本條件不俗，預計03年度盈利將達7000萬元，以發行股數2.8億股計，每股盈利將為25仙。慕詩上周五收報2.025元，預期PE8倍，以成衣股近期氣勢，預期PE升上10倍並不出奇，到時股價即為2.50元。
當然，此股近日升得較急，現價買入雖有水位，仍須提防調整壓力，隨時準備落車。
趙飛雲