世界盃決賽周三十二支參賽隊伍要喺今日遞交最後名單，但係英格蘭領隊艾歷臣重煩緊等唔等埋有傷在身嘅戴亞。
艾歷臣死都要等埋戴亞，全因為佢班波嘅後備力量唔夠。戴亞傷咗成個幾禮拜都重未好番，如果喺正常情況之下，艾歷臣真係唔會選佢踢世界盃。
之但係，艾歷臣手上嘅後補球員杜利華冼佳亞，只算係球會級球員，戰力同戴亞差好遠，根本未夠班踢世界盃。所以艾歷臣就算唔想等戴亞，迫於無奈都要等。
查實我求大俠都希望戴亞可以趕得切打世界盃。事關家陣英格蘭經已冇咗謝拉特，而碧咸𠲖家重未知打唔打到；如果再冇埋戴亞，佢哋條中場線就會冇晒創造力，咁樣唔單止影響佢哋嘅出線機會，重會減低賽事嘅可觀性。
「免費二奶台」間唔中轉播下NBA，原本對冇錢裝「收費台」嘅籃球迷嚟講係好事，可惜為咗遷就其他節目，時不時將部份過程刪減。好似噚日網隊對塞爾特人咁，個主持人口口聲聲話為咗追番美國嗰邊現場畫面，先至刪減部份過程；但其實場波朝早五點幾開波，「免費二奶台」十點幾先開始轉播，根本場波一早就完咗啦。我求大俠同好多網友都知道賽果，主持人咁講係唔係誤導觀眾呢？
馬拉當拿雖然冇份參加今屆世界盃決賽周，但係對阿根廷一樣咁有貢獻。事關佢會喺朝早同半夜上電台打鑼打鼓，叫醒阿根廷嘅國民起身睇波，兼且為國家隊打氣。不過，我求大俠就奉勸馬拉當拿日頭要唞足精神，若然瞓着咗叫唔到啲球迷起身睇波，真係俾佢哋怨死都似。
今年嘅NBA季後賽又再一次證明驕兵必敗嘅道理，各位重記唔記得塞爾特人嘅皮雅斯，喺對網隊賽前好大口氣話網隊冇一個可以擋得住佢，結果噚日佢俾人哋全場盯死，雖然重攞到二十七分，但係佢下半場只喺入咗可憐嘅兩球，最後搞到輸波兼冇晒face，你話係唔係自取其辱喇！
噚日有報道話鄭兆聰到日本做間諜，過中國隊嘅料畀哥斯達黎加，不過我求大俠覺得不如話聰仔做雙重間諜重好，因為佢同中國隊教練米路不知幾熟，話唔定喺日本打探咗哥國虛實後，話畀米路聽。講開又講，雖然呢啲報道話聰仔過畀哥國啲料麻麻，但我哋透過聰仔做咗哥隊教頭馬古拉斯同埋射手雲祖柏嘅專訪，相信讀者唔會覺得聰仔啲料冇用啩？
愛爾蘭嘅二十一歲中場列特諗住自己去唔到踢世界盃，就拿拿臨訂咗機票去巴巴多斯度假；點知堅尼地上星期因傷退隊，搞到佢又有份踢，但就嘥張機票，重要俾國家隊領隊麥卡菲話佢抵死。不過
E