發展商委託地產代理賣樓情況好普遍，但近期興玩獨家，連大發展商都加入趕潮流，繼新地九龍城獅子石道一號獨家委託中原做代理後，一向甚少搵代理賣樓嘅長實，都委託美聯物業獨家賣九龍塘翰林苑10個單位，聽講今日簽約時重會公布震撼優惠。發展商推售大型新盤嘅同時，都要繼續促銷細盤貨尾，唔怪得啲代理行猛話要請人啦！
蘭西最近收到均來集團同鴻運地產寄嚟嘅小欖愛琴灣售樓書，裏面介紹個盤嘅資料，好似位置、設施等，但封底就印咗本樓書嘅創作同設計係由cheerock公司負責，電話號碼就熟口熟面，諗真啲，原來係鴻運地產總機電話。打探之下先知樓書係由鴻運負責製作。
物業管理公司近期突然好多搞作，行內人對蘭西講原因係要向房署挖角（招聘員工），因為公司有前房署員工離職，所以要補充人手，點解唔請街外人呢？皆因當初物業管理公司競投房署外判嘅管理合約時，合約列明要請一定比例嘅房署員工，若唔夠數就要罰；所以有前房署員工流失，物業管理公司就要請番啲補數。遲啲就會見到物業管理公司搞房署員工招聘日。
蘭西