噚日天皇巨星費高繼續缺席早課，據葡萄牙新聞官講，費高繼續留喺酒店接受物理治療和特別練習，所以再冇跟大隊練波，為國家隊大局着想，如果費高冇十足狀態，都唔會畀佢落場踢中葡友賽；據聞落場機會重好微，一心買晒飛睇費高嘅港澳球迷聽到呢個消息就可能會失望嘞！
講番葡萄牙大軍噚日個早課，全長只有五十分鐘，過程就輕鬆到極；熱身後就玩一輪網式足球，之後再整番場唔畀用腳踢，只准用手同頭嘅分組賽，班球員就玩得笑容滿面。而原定今晚喺球場嘅晚課重取消埋，改喺酒店閉門練習，認真夠神秘。
葡萄牙備戰世界盃，其實只安排咗三場熱身賽；分別係輸畀芬蘭、和咗巴西，同星期六喺澳門對中國，集訓大軍組成至今更只得一場對中國嘅最後熱身賽，難怪隨隊來澳嘅葡國記者就十分擔心熱身賽不足，收操後捉住前鋒紐奴高美斯，問清楚國家隊會唔會因為熱身賽不足而谷唔起狀態。