呢排王子成日俾人問到8910幾時出？查實家陣「C記」搵鎮金店貼緊白金嘜頭「1010」上去，月底前一定蒲頭。關於呢部蕉，王子都係有啲嘢講，原來「諾記」個藍牙行1.1版本，但係喺街賣咗三輪的「愛記」藍牙耳筒，只係去到1.0同1.0B，所以「諾記」部蕉極有可能用唔到「愛記」隻牙。至於「諾記」自己隻牙就無咁快到，約莫六月尾七月初先派街。王子玩過行貨，繁體中文菜單就梗嘅，但係就無簡體中文菜單，各位行開大陸線嘅兄弟可能有啲頭痕。
快過8910出街嘅就係「愛記」未同「索尼」合併前的「史前文物」R600。「123」網頁接受緊預訂，行GPRS、WAP、3色背景燈，賣$1,280，得個平字。