蕭芳芳做主席嘅「護苗基金」，最近搵咗張國榮（哥哥）同莫文蔚做第一對「護苗先鋒大使」，噚日佢哋出席喺小西灣舉行嘅「護苗先鋒」記者會，哥哥同莫文蔚重即場向現場觀眾派每月定期捐款表格，搞到場面非常混亂。
哥哥、莫文蔚出錢又出力，佢哋除咗幫手做宣傳之外，重私人捐咗一筆錢畀「護苗基金」，而且即場簽咗一張慈善卡，畀護苗用嚟拍賣，底價係三百八十八元。
原來莫文蔚細個時都試過俾人非禮，佢話：「嗰時得十幾歲，有日放學返屋企，迎面有個男人擦身而過，突然伸手摸我私處，嚇到唔識嗌。返到屋企又唔敢同屋企人講。最近都有俾人博懵，早排去台灣做簽名會，俾人摸屁股，有時真係無得防。」
周星馳噚日喺上海，正式俾麥當勞選為內地廣告嘅代言人，麥當勞重會打破一貫傳統，將所有嘅廣告權交晒畀星爺間星輝公司承辦。喺廣告入面，星爺繼續發揮佢嘅搞笑本色，同一班《少林足球》嘅師兄弟喺球場上食薯條。
溫碧霞自從結咗婚之後，都好少同老公一齊出席公開活動，噚日佢就着住件紅色露肩連身裙，同老公一齊去咗旺角新世紀廣場參加「新地驕行動」，只見溫碧霞好似比前豐滿，着上tubedress顯得好性感。而另一性感女星安雅亦着住件背心仔到場，不過佢就差唔多喺活動完嗰陣先出現。
唔少藝人都鍾意用Nokia手提電話，最近該公司推出咗全球首部利用鈦金屬製造外殼嘅手電8910。呢部機外形充滿太空cyberfeel，Nokia為隆重其事，喺後日會舉行記者會，重會即場送四部手電畀四位型人，包括張國榮、李嘉欣、張天愛同鄭兆良。
宣萱噚日到商台接受雷宇揚主持的節目《靈幻搜奇》錄音訪問，話曾有相士批佢陽氣重，所以由細到大都未見過靈異物體。但自從喺兩、三年前同呂頌賢、林曉峰和楊婉儀到新加坡為無綫宣傳劇集時，喺酒店發生咗一件靈異事件之後，宣萱每次出埠都會帶定觀音心經傍身。
已經有三年時間冇喺馬來西亞開演唱會嘅王力宏（前左），已鐵定七月十三日喺馬來西亞開個唱，個唱嘅名叫做「王力宏不可思議大馬演唱會2002」。王力宏話會選擇可以容納多達一萬五千名觀眾嘅武吉加爾體育館演出，而且佢重已經邀請咗一位以上嘅天后級歌手助陣。