佘詩曼（阿佘）喺新片《情緣汽水機》入面扮演一名新潮神婆，性情八卦，阿佘深信跟住陳浩民就會行大運，所以一直對佢不離不棄。
但係有一次佢哋冷戰，阿佘暫別陳浩民，自此佢竟然頭頭碰着黑，連行街亦踩中釘，慘變跛妹。阿佘返到屋企重要一面攬實嚿幸運晶石，一面抱住隻痛腳嗌救命。
阿佘日前同馮仁昭講：「其實個角色都冇乜嘢，係講一個神婆，信有個『北』字嘅人會為自己帶嚟好運，於是我就一路向北行，直至遇到叫阿北嘅陳浩民，之後就發生咗好多搞笑嘢囉！」
因為阿佘喺套戲入面神神化化，所以基本上毋須扮靚，佢話：「拍戲係咁㗎啦，你睇番之前我拍嘅電影，套套都係咁上下打扮。」
憑《藍宇》一片喺香港金紫荊獎奪得影帝嘅胡軍，已經落實接拍內地電視台開拍嘅劇集《天龍八部》，飾演喬峰一角，而胡軍日前更喺杭州同《天龍八部》原著作者金庸見面，金庸對胡軍做大俠喬峰一角表示相當有信心。
至於同喬峰一對嘅阿朱，可能會由李小璐飾演。
好耐冇見嘅吳奇隆，噚日喺台灣去內地拍劇，中途喺香港轉機，有幾個鐘空閒時間就諗住同助手出市區行吓，有記者問佢嚟香港會唔會搵蔡少芬，佢就扮聽唔到。其後佢同助手去買票坐機鐵，點知助手搞咗好耐都未買到，佢就不斷俾記者影相，唔耐煩嘅奇隆於是催助手快啲，又猛問記者影夠未，最後助手匆匆買好就即走人。
台灣人氣組合F4前日喺上海出席一個電腦宣傳活動，佢哋喺亞洲各地都好受歡迎，但平時好少會舉行簽名會，所以𠵱家佢哋嘅簽名已經係網上炒到成兩萬新台幣（約四千五百港元），當中就以言承旭嘅簽名標價最高。不過F4嘅經理人就話，唔簽名係因為怕佢哋一簽就停唔到，所以寧願唔簽囉。
莫文蔚（Karen）前日喺台灣連趕兩場，日頭出席完簽名會之後，夜晚就即刻趕去喺彰化縣立體育場舉行嘅伍佰演唱會做表演嘉賓，Karen當晚着黑色小背心、白色長褲，同身穿白衫、戴白色眼鏡嘅伍佰做對黑白雙煞，兩人重分別攞住黑白扇喺台上大跳扇子舞，而Karen噚日經已返咗香港喇。
單親媽咪葉蘊儀，早幾晚同個女性朋友去咗跑馬地，佢哋見到記者影相好意外。當時葉蘊儀一身深色打扮，準備去附近嘅櫃員機提款，葉蘊儀話：「我攞錢咋，有乜嘢好影啫。」攞完錢之後，葉蘊儀就同朋友急急腳走人。
郭富城噚日下午一身白衣加卡其褲，戴住黑超同經理人小美一齊由北京返港，佢話今次去北京三日，係同內地一間服裝商簽約，佢已經係第二年幫呢個品牌做代言人，下個月佢就會飛去美國拍攝廣告硬照同電視廣告。
周潤發現正喺加拿大拍新片《防彈武僧》，前日佢生日，自然同發嫂一齊慶祝。發哥話今年嘅生日願望，係希望世界和平同個個健康快樂，而發仔重好關心婚變嘅張曼玉，發仔話希望佢無論遇到乜事都保持開朗。至於喺《防彈武僧》裏面，發哥就飾演一個百歲武僧，但係外形就完全睇唔出佢咁老。