香港出名係購物天堂，土耳其一班歐洲球員當然識貨，噚日佢哋喺操練前，包括加拉塔沙雷前鋒哈辛在內嘅幾位球員，一齊去中環Shopping，而佢哋最有興趣嘅，就係數碼相機、手提電話等高科技產品。
南非前鋒麥卡菲技術出色眾所周知，但原來佢喺球隊入面，搞氣氛亦非常能手。噚日南非喺大球場操練時，麥卡菲每射入一球都會向失手嘅門將示威，雖然佢嘅行徑有啲令人討厭，但難得佢可以百發百中，隊友都冇佢辦法。
主辦單位原本安排土耳其噚日喺大球場作最後備戰，點知天公不造美，大球場因為天雨關係而封場。南非、蘇格蘭以至港聯先後都可以喺大球場操練，惟獨土軍冇份，佢教頭根尼斯一怒之下，噚日轉往小西灣運動場操練時，索性請足總職員及傳媒吃閉門羹。