公益金捐款嚴重不足，主席陳祖澤雖然多計仔，亦都冇符。今時唔同往日，咁嘅經濟環境，咁嘅失業率，一般中產階級同基層市民，想捐錢都有心無力，惟有倚靠大戶、大公司捐獻。但係真正有水喉大戶，確係頭都大，每日收到嘅「打心口」信，不知凡幾，都唔知應酬得邊個，個個都係老友，捐畀A唔捐畀B，會有是非㗎，於是索性唔捐，藉口多籮籮啦，公司正在搞緊裁員減薪、資源增值、緊縮預算之際，邊個敢冒員工怒吼之風險，拎大嚿錢去捐呀！
電台財經節目主持人林一紅話不如請地產公司響應公益金嘅「十元運動」，每逢開售新樓盤，數住幾多人嚟睇樓參觀，每一個就捐十蚊，譬如一萬人參觀新樓盤，地產公司就捐十萬元畀公益金，當畀公關費或廣告費啫，抵到爛；如果呼籲吓，參觀新樓盤嘅有錢人，每人亦捐十蚊，一萬人捐十萬蚊，公益金嘅得益更大。左丁山諗諗吓，不如地產公司再跟入票數目，譬如六千票，每票捐一百，總共捐六十萬。近來失業率雖高，睇一手樓嘅市民數目大增，新樓銷售暢旺，林一紅呢條橋，咪話唔盞。
懇請公益金主席陳祖澤立即同地產商商量，推出一個「睇樓買樓，掛住公益金」嘅捐款運動，地產商賣新樓，動輒套現十億八億甚至三四十億元，捐番幾十萬，濕濕碎啦，當廣告費之嘛。